隨筆 | 前老闆 K 先生●

尋晚，我send 左封thank you email 俾某任前老細 K 先生

幾年前，我見工個陣第一次見到 K 先生，佢係一個我好刻版印象中，典型既德國人；

高大，外表睇落好cool，講野語調無咩起伏而重base。

本身諗住會好嚴格，會問好多專業性既問題，但出奇地面試既過程完全唔似面試；

好記得一入到房，佢邀請我坐係客座梳化。

呢個小小gesture 已經令我感到被重視，作為成間公司最大粒個個，佢大可以唔咁做。

同佢外表相反，K 先生係我職場打滾咁耐而黎，認識過最nice 既人之一。

佢無論對外定對內，對新/舊/senior/junior同事，都係同一個態度；

好記得有一次，有位返左幾日工既intern同事， happy hour 個陣隨口提左句好想試「響」(某隻日本Whiskey)；兩個星期之後oktoberfest，K 先生搞home party，請晒同事去佢屋企玩， K 先生真係記得，仲特登買左個支響17俾intern同事試；

(雖然後續係intern同事醉到要直接係K 先生屋企過夜，要佢兩公婆照顧佢..)

雖然性格友善，但係商業談判同管理公司日常方面， K 先生都係我見過最tough 而且控場度最高既管理層。

佢可以同時做到New York Corporate 式既朝9晚9，同時又兼顧到歐洲式重視屋企，分配時間俾佢地。

對一D 商業上既原則，佢會好硬頸，堅持自己睇到既Vision，唔會輕易俾唔同noise 影響到擺棋不定；

對內部管理，佢會講得好清楚佢既要求係咩，有咩係non-negotiable，做operation decision 都會講求vision and strategic planning。

對員工，佢都係當佢地係獨立既individual 去睇，而唔係淨係睇到佢地既job title。

另外一件事：

我本身唔係咩典型既穩定輸出型秘書，每下打50 50 50 我係傾向神經刀型，一時打200 一時打20

有一排我輸出keep住得20個陣，咁啱去到要做apprasial既季節； K 先生叫我係Rosewood揀間餐廳做個apprasial lunch ，我因為知自己個排表現唔好，所以我策略性部署揀間最平，於是去左Holt's 食叉燒飯。

成個apprasial chat 佢無講過我做得「點唔好」法，而係重點放係「點解」；講到inconsistent 係阻礙我perform 既因素，佢話佢都有責任同我一齊進步，諗方法點去tackle 呢樣野。

「You are doing the most difficult job in the company」

呢個係一句classic 西式既鼓勵說話，但呢句說話我記到而家，因為當刻覺得自己處境有人見到；

Again ，其實佢大可以唔洗咁講。

商業/企業既本質都係金玉其外，呢個大家都知；企業營運既日常，就係不停解決問題，然後再出現新問題，呢個係必然定律。

你可以話「佢做樣啫, strategy 黎」；但係咁既商業環境，要持續地做樣，如果你本身心地唔夠好都唔係咁容易做到。而如果知道做下樣可以令員工感到受重視，令公司經營穩定，又係唔係每個老細都肯願意咁做？

有毒職場害身心, 相反好既職場絕對都可以改變一個人既價值觀。

同K 先生共事，影子學習佢既呢幾年，對我之後既career取向同心態都有好大引導性既影響；我係封thank you email 都係咁同K先生講。

而我諗返轉頭，搞免費AI 私補既一個推動力，好大程度上都係因為我會傾向相信每個人既獨特性；

雖然有時會過於focus 係vision 上，而有近乎盲目既樂觀，但do something good ，有時比獲利更有推動力去做一件事。