隨筆 | 談 AI 應用「新/舊世界」心態流●

用「新/舊世界」心態流 , 看待 AI 應用

十年前剛畢業，第一份工係一間紅酒舖既sales

當時本住對紅酒有興趣，想學多D 野既心態去做個時剛剛過probation 又覺得自己開始識得多野，於是個人變得輕浮

就係咁，我迎來左第一次俾客鬧既經歷

飲過紅酒既朋友可能知道紅酒有分「新世界」同「舊世界」

「新世界」指從美國，澳洲之類既國家造既紅酒。新世界酒傾向非傳統，易入口，風味簡單，而且大量生產價錢較平。

「舊世界」指傳統造酒國家，例如法國波爾多，意大利之類既紅酒。風味傾向複雜有層次感，而且強調以傳統劃分級數既系統，去定義每支酒。

當時有個熟客，佢個仔要擺酒，想幫個仔買5箱紅酒俾賓客宴會用我聽完佢話要擺酒之後，二話不說推薦左支新世界既澳洲酒俾佢，因為：

平，易入口，容易襯唔同菜式，又唔洗breathe (補充：某D 紅酒需要你開完一段時間，俾空氣入去，先會變得好飲）

宴會有咁多人，呢D option最適合唔同賓客人士，咁多好處，實冇死啦係咪？

當時我都係咁諗，而且沾沾自己俾左個絕世好既suggestion 出黎，又幫舖頭R 到單。但呢單係呢個熟客係我地舖頭既最後一張單。

呢個客本身都識飲酒，我推薦佢既時候佢都有反問呢支可唔可靠話黎飲既好多都係佢D 酒友

我個陣只係focus 係「我覺得」呢支新世界酒既特色「好處」上面；

結果婚宴完左之後，呢個熟客返返黎搵我經理當住我面同佢講，

個新仔冇料到，推埋D 垃圾酒唔好飲之餘又難睇，好冇面

又話佢D 酒友半講笑咁講，佢明明識酒，飲開好野點解都幫佢個仔揀呢支，佢阿媽完全唔識飲都揀得好過我

有時，最難受既唔係俾人當面直接辱罵你，而係呢D單單打打既說話。而且你以為自己一件事做得好好，但其實係人地心目中你根本冇料到；兩者加埋既衝擊，對剛出黎做野既我係一個震撼教育。

其實個熟客原來根本唔介意俾多少少錢，去揀支門面睇落更好睇既酒。

我冇去了解多D 呢個選擇，對佢黎講可能同時有

「作為朋友話題」「對主人家印象」「賓客背景同飲用風味既傾向」

等等既價值

呢件事令我開始去諗咩叫「好處」，咩叫「價值」

AI 呢件事聽落，冇錯，有好多好多唔同既好處

但

我聽到更多既係，未搵到件事對自己真正既價值所在

現有既workflow，就好似舊世界酒咁，有無可取代既價值

例如傳統既價值觀，人性化，對事情既掌控權，習慣性等，人類社會智慧係累積既，所有野都有佢出現既「理由」，要一下子完全拼棄係違反人性

AI 既出現就好似新世界酒咁，有可視既各種好處，都有佢出現既理由，我地唔一定要好似而家主流咁強調「取代」，反而可以試下，去搵一個平衡點，搵到件事對每個人既意義同價值

比起淨係all in 一邊既世界，擁抱兩邊可能令你試多D 唔同新既體驗，咁樣唔係更好咩？

舊既紅酒，面世已經有好耐歷史新世界既紅酒，可能出現只係一百幾十年

每個人對於新同舊既事物，都會有自己既一套價值觀

放諸AI 應用就係，每個人都有既有做野既工作流程同習慣可以係寫文，可以係造圖，可以係唔同方面既工作

作為一個想推廣AI , 想更多人去試既人

我會檢視自己，有冇代入其他人既角度去「sell AI」呢件事

而家主流好多時候都淨係focus 係 AI 既好處，然後將佢帶到唔同人面前

我覺得呢個風氣，對於AI 普及化黎講唔係一件好事因為每個人都有唔同既應用preference

而家去行一轉酒舖你會發現新世界酒同舊世界酒都有得買，和平相處個客可以根據唔同喜好同場境，去選擇唔同option

我覺得AI 應用都應該向呢個方向發展，去搵件事對唔同人黎講，唔同既「價值」而唔係只係重視新個套點去取代舊個套